«ЭКСПО» белгісі Қазығұрт асуына таңбаланды

«ЭКСПО» – ел үшін елеулі оқиға. Көпестердің көрнекі шарасы ретінде басталған жиын бүгінде өнертапқыштар көрмесіне айналған. 22 күннен кейін әлем білгірлері Астанаға келеді. Болашақтың баламалы энергия көздерін саралайды. Инновациялық жобалар бойынша өзара тәжірибе алмасады. Әлемдік қоғамдастықтың алдында Қазақстанның туристік тартымдылығы және танымалдылығы артады. Ауқымды шараға бүгінде дайындық қызған.

15:44, 19 мамыр 2017   124

Осы орайда қазығұрттықтар да  өздігінше қармануда.  Ғалам ғажаптары паш етілетін көрменің төл белгісін ауданның құрылыс және сәулет бөлімі  Қазығұрт асуына бейнеледі.  ЭКСПО логотипіндегі жаңартылған энергиялар таңбасы   75 метр биіктіктен  менмұндалап тұр.  Көк түспен – теңіз толқындары,  сары түспен – күн энергиясы, жасылмен жел мен жер айшықталған.  Белгідегі әр қанаттың көлемі  10 метр шамасында. «ЭКСПО» деген жазуы  болса, 3 жарым метрге дейін таспен қаланған. Төлтаңба Қазақстанның жаңа технология саласындағы табысын,  көрме қарсаңындағы дайындығын,  қазақы қонақжайлығын паш етеді.

НҰРСҰЛТАН Әбдірашит

«Қазақстан-Шымкент» телеарнасының ресми сайты

160000, Шымкент қаласы, Қазыбек би көшесі, 20 үй Байланыс телефондары: 8 (7252) 53-62-07