Шымкентте 2025 жылға дейін 40 мектеп жеке инвестор есебінен салынады. Бүгін қала әкімі Мұрат Әйтенов инвестор есебінен салынып жатқан жекеменшік мектептердің құрылысымен танысты. Әкім аралау барысында дендросаябақ жанында салынып жатқан 450 орындық мектепті және Арғынбеков көшесіндегі 1000 балаға шақталған жекеменшік білім ордасын көрді. Онда әкім аталған жекеменшік мектептерге білім басқармасымен бірлесе отырып білікті ұстаздар ұжымын жасақтауды қазірден бастап қолға алу қажеттігін айтты.

Жүргізіліп жатқан әрбір құрылыстың сапалы атқарылуы адам өмірінің қауіпсіздігімен байланысты екенін айтқан қала басшысы бұл бағыттағы жұмыстарды бақылау қашан да назардан түспеу керектігін ескертті. Сонымен қатар, әкім білім саласының инфрақұрылымын шешу мақсатында өткен жылы 5 жылдық жоспар жасалынғанын, ол бойынша 2025 жылға дейін Шымкентте 85 мектеп ашылатынын жеткізді. "Қоғамдық көлік схемасы оқушыларға тиімді болу керек" Тұран шағын ауданында салынып жатқан 1200 орындық мектептің құрылыс жұмыстарын бақылау барысында қала әкімі осылай деді. Осы жылдың тамыз айында пайдалануға берілетін білім нысанының сапасына баса назар аударған қала басшысы кемшіліктер орын алмас үшін өткен жылы пайдалануға берілген мектептермен ақылдаса отырып жұмыс жасауды құрылыс және білім басқармасына тапсырды.  Шаһар басшысының айтуынша, бес жылда салынатын мектептердің 33-і мемлекет есебінен, 12-сі мемлекеттік-жекеменшік әріптестік негізінде болса, 40 мектепті жеке инвесторлар салады екен.

 

АВТ. НҰРСҰЛТАН. Ә